"Тулпар" картасы менен Ташкентте жол кире төлөнө баштайт
Бишкек шаарындагы коомдук транспортто накталай эмес төлөмдөрдү ишке ашырган "Тулпар" долбоорун Ташкент (Өзбекстан) шаарындагы өнөктөштөр менен интеграциялоо иши акыркы баскычка жетти. Бул тууралуу бүгүн өткөн басма сөз жыйынында "Тулпар" долбоорунун операциялык ишмердүүлүк боюнча директору Бекжан Акматбеков билдирди.
Анын айтымында, интеграцияны 2026-жылы толук аяктоо пландалууда.
"Андан кийин “Тулпар” карталарынын колдонуучулары Ташкент шаарындагы коомдук транспортто жол кирени төлөй алышат, ошондой эле Ташкенттин тургундары өз карталары менен Бишкекте жол акысын төлөй алышат", — деди Бекжан Акматбеков.
Ал ошондой эле "Тулпар" долбоору Кыргызстандагы камтуу аймагын кеңейтүүнү көздөп жатканын кошумчалады.
"Учурда бир нече шаарлар менен сүйлөшүүлөр жүрүп жатат. Эгер орток пикирге келе алсак, кийинки жылы Балыкчы, Нарын, Кара-Балта шаарларында ишке ашырууну башташыбыз мүмкүн", — деп белгиледи ал.
