Ош шаарында 4 көчө асфальтталып, пайдаланууга берилди
Ош шаарындагы Төлөйкөн айыл аймактык башкармалыгында Карымов, Тешебаев, Аматбеков жана Туташов көчөлөрү асфальтталып, пайдаланууга берилгенин шаардык мэрия билдирди.
Аталган көчөлөрдө унаа кыймылына бир топ ыңгайсыздыктар болуп келген. Шаар башчысы Жеңишбек Токторбаев рейддик кыдырууда маселени жеринен көрүп, дароо тапшырмаларды берген.
Бүгүн аталган жол көйгөйүнө чекит коюлуп, шаар жетекчиси көчөлөрдү расмий түрдө ачып, унаа кыймылына старт берди. Аймактын жашоочулары жолдордун жаңыланып, кеңейтилип оңдолушун кубануу менен кабыл алышты. Бул маселени чечүүгө шаардык кеңештин депутаттары да өз салымдарын кошкон.
Жалпы жолдун узундугу 1200 метрди түзөт, жөө жүргүнчүлөр үчүн 2400метр болгон өзүнчө эки тараптуу тротуарлар каралган.
Жол мурдагы калыбынан 10-12 метрге чейин кеңейтилген жана ирригациялык арык казылган.
