ЖК депутаттарына жеке айдоочулар берилбейт
Кымбат кызматтык унаалар бар, айдоочулар жок: депутаттар айдоочунун акысын өз чөнтөгүнөн төлөшү керек
Жогорку Кеңештин депутаттарына кытайлык Li Xiang L7 маркасындагы жаңы кызматтык унаалар берилди. Бул унаалардын сатып алынышы 2025-жылдын жаз айларынан бери талкууланып келген. Маалымат булактарынын айтымында, автоунаалар эл өкүлдөрүнө өткөрүлүп берилип, учурда парламенттин унаа токтотуучу жайында турат.
Бирок жаңы кроссоверлер менен кошо депутаттар маанилүү бир жагдайга туш болушту: аларга айдоочулар берилбейт. Айдоочуларды өздөрү таап, алардын эмгек акысын депутаттар өз каражатынан төлөшү керек. Бул тууралуу эл өкүлдөрүнүн өздөрү билдиришти. Айрым депутаттар айдоочу жалдабай, кызматтык унааларды өздөрү айдай турганын айтышууда.
Айдоочуларды каржылоо маселеси боюнча Жогорку Кеңеш азырынча кошумча түшүндүрмө бере элек.
