Бишкекте бардык унаа токтотуучу жайларга QR-код аркылуу төлөө орнотулат
Бишкек шаарында 3 миң 221 унаа токтотуучу орун (машино-орун) бар экенин "Эмгек" жана "Жаңы Күч" фракцияларынын биргелешкен жыйынында "Шаардык жол-транспорттук инфраструктура" муниципалдык ишканасынын жетекчиси Бакай Асылбек уулу билдирди.
Буга чейин шаардык кеңештин депутаты Элнура Дүйшекеева борбор калаада канча муниципалдык унаа токтотуучу жай бар экенин сураган.
Муниципалдык ишкананын жетекчисинин айтымында, учурда унаа токтотуучу жайлар үчүн QR-код аркылуу төлөө боюнча пилоттук долбоор ишке ашырылууда. Бул чара унаа токтотуучу жайларда иштеген акча жыйноочуларды жоюу максатын көздөйт.
"Азыр Бөкөнбаев көчөсүнөн Жибек Жолу проспектисине чейинки аймакта QR-код аркылуу төлөө системасы киргизилди. Эгер мурда пландуу түрдө 50 миң сом түшсө, азыр 250 миң сом түшүп жатат. Мындан ары мындай QR-коддор борбор калаанын бардык аймактарына орнотулат", — деди ал.
