Аэропорт трассасында жолду булгаган компаниялар жоопкерчиликке тартылды
Бишкек шаарынын мэриясынын муниципалдык инспекциясы Бишкек – "Манас" эл аралык аэропортуна кеткен трассанын (Васильевский тракт) боюндагы курулуш объекттеринде жолдун санитардык абалынын сакталышына көзөмөл жүргүзүүдө.
Муниципалитеттен билдиришкендей, текшерүү учурунда курулуш техникалары жолго топурак чыгарып кеткен фактылар аныкталды.
"МЭНС" ЖЧКсынын курулуш аянтчасында дөңгөлөк жуучу пункт талапка ылайык колдонулган эмес. Буга чейин берилген көрктөндүрүү эрежелерин сактоо боюнча талап аткарылбагандыгына байланыштуу компанияга КРнын Укук бузуулар жөнүндө кодексинин 177-беренесинин 2-бөлүгү боюнча протокол түзүлдү. Ошондой эле жолдун булганышын алдын алуу үчүн участокту бетон менен каптоо боюнча кайрадан талап коюлду.
Ал эми "Манас Моторс" ЖЧКсынын объектинде дөңгөлөк жуучу пункт жок экени аныкталды. Компанияга үч күндүн ичинде эстакада жана трансбой орнотуу талабы коюлду. Талап аткарылбаса, мыйзам чегинде чаралар көрүлөт.
