МКУ жыл башынан бери 325 жаранга ОСАГО боюнча 33 млн сом төлөп берди
2026-жылдын башынан бери Мамлекеттик камсыздандыруу уюму(МКУ) унаа ээлеринин жарандык жоопкерчилигин милдеттүү камсыздандыруу (ОСАГО) боюнча 325 жаранга 33 млн сомдон ашык каражат төлөп бергенин "Биринчи радио" эфиринде камсыздандыруу жана кайра камсыздандыруу департаментинин директору Актан Турумбеков билдирди.
Анын айтымында:
- 2024-жылы 48 автоунаа ээси 4,3 млн сом төлөм алган;
- 2025-жылы 901 учур жөнгө салынып, 86,5 млн сом төлөнгөн.
2024-жылы МКУ болжол менен 74 миң ОСАГО полисин түзгөн, ал эми 2025-жылы бул көрсөткүч 350 миңден ашкан.
"2026-жылдын 1-январынан тарта полистердин саны 18 миңден ашты. Бул камсыздандыруу түрү жарандардын жашоосуна бекем киргенин көрсөтөт. Айрымдар айып пулдан качуу үчүн гана алса, көпчүлүк жарандар мүмкүн болуучу тобокелчиликтерден коргонуу үчүн аң-сезимдүү түрдө келишим түзүүдө", — деди Актан Турумбеков.
Эфирде айтылгандай, Кыргызстанда 1,7 миллиондон ашык автоунаа катталган. Алардын жарымынан көбү ОСАГО полисине ээ.
