Ош шаарына 20 даана балдар автобусу алып келинет

Ош шаарындагы Өзгүр айылына караштуу Солнечный дача аймагында балдар үчүн өзүнчө автобус каттамы ачылат. Бул тууралуу шаар мэри Жанар Акаев 3-июлда тургундар менен болгон жолугушуусунда билдирди.

Калаа башчысынын айтымында, жакын арада Ош шаарына 20 даана балдар автобусу берилет. Алардын бири Солнечный дача аймагындагы окуучуларды ташуу үчүн бөлүнөт.

Жолугушууда жергиликтүү тургундар таза суу, коомдук транспорт жана балдар бакчасынын жетишсиздиги маселелерин көтөрүштү. Учурда аталган аймакта 400дөн ашык адам жашайт.

Мэр ошондой эле Солнечный дача тилкесин таза суу менен камсыздоо маселеси чечилгенин билдирип, курулуш иштери сентябрга чейин башталарын айтты. Долбоор ишке ашкандан кийин аймак толугу менен таза суу менен камсыз болот.

Мындан тышкары, тургундардын маршруттук каттамды жакшыртуу жана балдар бакчасын куруу боюнча сунуштары тиешелүү кызматтарга тапшырылды.