Акыркы окуялардан кийин бардык авиакомпаниялардын учактары текшерилет
Жарандык авиация мамлекеттик агенттиги “Манас” эл аралык аэропортунда TezJet авиакомпаниясынын учагы менен болгон окуядан кийин кырдаалды көзөмөлдөп жатат.
Агенттиктин маалыматына ылайык, TezJet каттамдарын убактылуу токтотуу боюнча чечим бардык текшерүүлөр аяктап, окуянын себептери такталганга чейин күчүндө болот.
Ошондой эле учуу коопсуздугун камсыздоо максатында Кыргызстандын башка авиакомпаниялары да кошумча текшерилет. Анда учактардын техникалык абалы, пайдалануу талаптары жана авиациялык эрежелердин сакталышы бааланат.
Эске салсак, 7-июлда Бишкек–Ош багыты боюнча учкан TezJet учагы көтөрүлүп жаткан учурда арткы шассиси бузулган. Учактагы 181 жүргүнчү жана экипаждын 6 мүчөсү аман-эсен чыгарылган.
Ошондой эле 9-июлда “Асман Эйрлайнс” авиакомпаниясынын Бишкек–Раззаков багыты боюнча учкан учагы техникалык себептен улам “Манас” аэропортуна кайра конгон. Компания бул окуяны техникалык кырдаал катары түшүндүргөн.
