Кытай–Кыргызстан–Өзбекстан темир жолу боюнча сүйлөшүүлөр өттү
10-июлда Кыргызстан менен Кытайдын темир жол тармагынын өкүлдөрү жолугушуп, Кытай–Кыргызстан–Өзбекстан темир жол долбоорун ишке ашыруу маселелери талкуулашты. Бул тууралуу Транспорт жана коммуникациялар министрлигинен билдиришти.
Жолугушууга транспорт жана коммуникациялар министринин орун басары Алмаз Тургунбаев жана Кытай темир жол корпорациясынын башкармалыгынын мүчөсү Ван Цзиньси баштаган өкүлдөр катышты.
Тараптар долбоордун учурдагы жүрүшүн талкуулап, темир жол курулушу активдүү баскычка өткөнүн белгилешти. Ошондой эле негизги эл аралык жана инвестициялык келишимдер түзүлүп, каржылык маселелер чечилгени айтылды.
Учурда долбоордун алкагында тоннелдерди, көпүрөлөрдү куруу жана башка инфраструктуралык иштер жүргүзүлүп жатат.
Кыргыз тарап курулуш иштерине жергиликтүү жумушчу күчүн тартууга, ата мекендик өндүрүүчүлөрдүн материалдарын жана жабдууларын колдонууга, ошондой эле экологиялык талаптарды жана тарыхый-маданий мурастарды коргоо чараларын сактоого көңүл бурду.
Тараптар темир жол долбоорун белгиленген мөөнөттө ишке киргизүү үчүн курулуш иштерин тездетүү боюнча кызматташууну улантууга даяр экенин билдиришти.
