Селден кийин Балыкчы — Жалал-Абад жолунда каттам толук ачылды
Балыкчы — Жалал-Абад багытындагы Түндүк–Түштүк альтернативдүү унаа жолунун 361–367-чакырымдарында жүргөн селдин кесепети толугу менен жоюлуп, эки тараптуу каттам ачылды.
Транспорт жана коммуникациялар министрлигинин маалыматына ылайык, 14-июль күнү кечинде үч жерде сел жүрүп, жолдун бир тарабы убактылуу жабылган.
Жерине №31 Жол тейлөө мекемесинин кызматкерлери тартылып, атайын техникалардын жардамы менен тазалоо иштери жүргүзүлгөн. Жолчулар таңкы саат 04:00гө чейин сел түшкөн тилкелерди толугу менен тазалап, жолду коопсуз пайдаланууга даярдашкан.
Бүгүн таңкы саат 06:00дөн тарта аталган тилкеде эки тараптуу кыймыл толугу менен калыбына келтирилди.
Учурда жолдун жээгинде калган сел калдыктарын тазалоо жана жолдун туурасын кеңейтүү иштери уланууда. Министрликтин маалыматына караганда, абал тиешелүү жол кызматтарынын көзөмөлүндө.
