Кытай тарап Пекин – Бишкек багыты боюнча туруктуу аба каттамдарын ачат
Кытайдын улуттук авиакомпаниясы "Air China" Пекин – Бишкек – Пекин багыты боюнча туруктуу каттамдарды ишке киргизет. Бул тууралуу "Кыргызстан аэропорттору" ачык акционердик коому билдирди.
Маалыматка ылайык, жаңы каттамдар заманбап Airbus A321 учактары менен жумасына үч жолу — дүйшөмбү, жума жана жекшемби күндөрү аткарылат.
Азиядагы ири авиаташуучулардын биринин Кыргызстанда ишмердүүлүгүн башташы өлкөнүн эл аралык авиация жаатындагы беделин бекемдеп, Кыргызстан менен Кытайдын ортосундагы аба байланыштарын кеңейтүүгө өбөлгө түзөрү айтылды.
"Кыргызстан аэропорттору" ААК белгилегендей, жаңы авиакаттамдын ачылышы эл аралык каттамдар тармагын өнүктүрүү жана Кыргызстандын транспорттук байланыштарын чыңдоо боюнча жүргүзүлүп жаткан иштердин жыйынтыгы болуп эсептелет.
