Өлкө боюнча 1208 чакырым жол асфальтталды
Өлкө аймагында жол куруу жана оңдоо иштери жогорку темпте уланууда. 2026-жылдын 19-августуна карата республика боюнча жалпы 1208 чакырым жолго асфальт төшөлдү. Бул тууралуу Транспорт жана коммуникациялар министрлигинин маалымат кызматы билдирди.
Бул көрсөткүч өткөн жылдын ушул мезгилине салыштырмалуу эки эсеге жакын өстү. Тактап айтканда, 2025-жылдын 19-августуна карата өлкө боюнча 597 чакырым жол асфальтталган. Быйыл асфальтталган жолдордун көлөмү 611 чакырымга көбөйдү.
Жол куруу жана оңдоо иштеринин көлөмүнүн өсүшү өлкөнүн транспорттук инфраструктурасын жакшыртуу, аймактардын жол байланышын бекемдөө жана калк үчүн транспорттук жеткиликтүүлүктү жогорулатуу багытында жүргүзүлүп жаткан иштердин натыйжасы болуп саналат.
Учурда республиканын бардык аймактарында автомобиль жолдорун куруу, реконструкциялоо жана оңдоо иштери уланууда. Аткарылып жаткан иштердин сапаты жана курулуштун жүрүшү Транспорт жана коммуникациялар министрлигинин көзөмөлүндө.
