ДКО-2026: Кырчынга конокторду 300 кичи автобус акысыз ташыйт
Бишкектеги ДЕПО-2нин аймагында шаар мэри Айбек Джунушалиев VI Дүйнөлүк көчмөндөр оюндарынын транспорттук камсыздоосуна тартылуучу кичи автобустардын айдоочулары менен жолугушту.
Бишкек мэриясынын маалыматына ылайык, эл аралык спорттук иш-чарага даярдыктын алкагында Транспорт жана жол-транспорт инфраструктурасы департаменти тарабынан 300 кичи автобус тартылат. Алар шаар тургундарын жана конокторду Кырчын жайлоосуна акысыз ташыйт.
Транспорттук тейлөө үч негизги багыт боюнча уюштурулат:
- Баает айылы – Кырчын жайлоосу;
- Чолпон-Ата шаарындагы ат майданы – Кырчын жайлоосу;
- Жаркынбаев айылы – Кырчын жайлоосу.
Бардык кичи автобустар техникалык кароодон өткөрүлүп, талаптарга ылайык даярдалат. Айдоочулар да атайын инструктаждан өтүшөт. Ошондой эле транспорттун үзгүлтүксүз иштешин камсыздоо үчүн 15 резервдик кичи автобус каралган.
Транспорт департаменти жүргүнчүлөрдү ташууну уюштурууну жана тартылган кызматтардын ишин координациялайт. Мындан тышкары, наркологиялык жана психологиялык коштоо боюнча адистер да иш алып барат.
Жолугушууда шаар мэри Айбек Джунушалиев транспорттук камсыздоого катышуу ыктыярдуу негизде жүргүзүлөрүн белгиледи.
Ошондой эле ал айдоочулардын катышуусуна байланышкан бардык чыгымдарды мэрия өз мойнуна аларын айтты. Анын ичинде айдоочулардын жатаканасы, тамак-ашы жана транспорт бузулган учурда техникалык колдоо көрсөтүү камсыздалат.
Жыйын соңунда мэр айдоочуларды алдыдагы ишке жоопкерчилик менен мамиле жасап, оюндардын катышуучуларына жана конокторуна сапаттуу кызмат көрсөтүүгө чакырды.
