Жибек-Жолундагы канализациялык коллектор жаңыланып, жол кыймылы ачылды
"Бишкексууканал" муниципалдык ишканасынын маалыматына ылайык, иштер "Жибек-Жолу проспектисиндеги Турусбеков көчөсүнөн Кулиев көчөсүнө чейинки канализациялык коллекторду капиталдык оңдоо" долбоорунун алкагында жүргүзүлдү.
Муниципалитеттен билдиришкендей, долбоордун жүрүшүндө канализациялык коллектордун диаметри 300 миллиметрден 600 миллиметрге чейин кеңейтилип, жаңы тармак Кулиев көчөсүндөгү шаардык канализациялык коллекторго кошулду.
Жалпысынан 1 243 метр канализациялык түтүк төшөлүп, диаметри 1 500 миллиметр болгон 34 темир-бетон канализациялык кудук орнотулду. Түтүктөрдүн көмүлгөн тереңдиги 3,8 метрден 6 метрге чейин жетет.
Ошондой эле Жибек-Жолу проспектисинин Иманалы Айдарбеков көчөсүнөн Турусбеков көчөсүнө чейинки тилкесинде жолдун асфальт-бетон жабуусу толугу менен калыбына келтирилди.
Белгиленгендей, бул тилкедеги канализациялык коллектор 1961-жылы курулган. Диаметри 300 миллиметр болгон эски түтүктүн өткөрүү мүмкүнчүлүгү жетишсиз болуп, саркынды суулар менен жүктөлүшү 140 пайызга чейин жеткен.
"Бишкексууканал" билдиргендей, долбоордун ишке ашырылышы канализациялык тармактын өткөрүү жөндөмдүүлүгүн жогорулатып, инженердик инфраструктурага болгон жүктү азайтууга жана суу агызуу системасынын ишенимдүү иштешин камсыз кылууга шарт түздү.
