Кызыл-Туу – Манас-Ордо жолун асфальттоо аяктоо алдында
Талас облусундагы Кызыл-Туу – Манас-Ордо автомобиль жолунда асфальт төшөө иштери жүрүп жатат. Бул тууралуу Транспорт жана коммуникациялар министрлигинин маалымат кызматы билдирди.
Транспорт жана коммуникациялар министринин орун басары Бактылуу Момбеков Талас облусуна болгон иш сапарынын алкагында жолдогу курулуш иштеринин жүрүшү менен таанышты.
Учурда жолго асфальт төшөө иштерине 40ка жакын атайын техника жана 50дөй жумушчу тартылган.
Маалыматка ылайык, асфальт төшөө иштерин ушул жылдын август айынын аягына чейин аяктоо пландалууда.
Бактылуу Момбеков жооптуу кызматкерлерге курулуш иштеринин сапатын камсыз кылуу жана белгиленген мөөнөттү так сактоо боюнча тапшырмаларды берди.
Жол куруу иштеринин сапаты жана аткарылышы Транспорт жана коммуникациялар министрлигинин көзөмөлүндө.
