Оштогу Авицена көчөсү кеңейтилет
Ош шаарынын Манас-Ата муниципалдык аймактык башкармалыгына караштуу Авицена көчөсүндө жол куруу иштери башталды. Бул тууралуу Ош шаардык мэриясынан билдиришти.
Долбоорго ылайык, жол төрт тилкелүү болуп, туурасы 26 метрге чейин кеңейтилет. Ошондой эле жолдун жээгине бордюрлар, ирригациялык тармактар орнотулат. Жөө жүрүүчүлөр үчүн ыңгайлуу тротуарлар курулат.
Учурда курулушка даярдык көрүү иштеринин алкагында электр мамычаларын, газ түтүктөрүн жана башка инженердик-коммуникациялык тармактарды көчүрүү иштери жүргүзүлүүдө. Даярдык иштери аяктагандан кийин жолго асфальт төшөлөт.
Мындан тышкары долбоордун алкагында узундугу 24 метр болгон жаңы көпүрөнүн курулушу да каралган. Асфальт төшөө иштеринин жүрүшүндө коопсуздукту камсыз кылуу максатында жолдун айрым тилкелери убактылуу жабылышы мүмкүн.
Ош шаардык мэриясы жарандардан алдын ала убактылуу ыңгайсыздыктарга түшүнүү менен мамиле кылуусун өтүнөт.
