Карызын төлөгөн 5 миңден ашык субъектиге карата 257 млн сомдук туум жана санкция эсептен чыгарылды – МСК
КРнын Мамлекеттик салык кызматы 2020-жылдын август айынан 2021-жылдын 24-майына чейин салык жана камсыздандыруу төгүмдөрү боюнча карызын төлөгөн 5 миң 749 субъектиге карата 256,7 млн сом туум жана санкцияны эсептен чыгарды. Бул тууралуу МСКнын маалымат кызматы билдирет.
Салык карызынын негизги суммасын жойгон 4 миң 246 салык төлөөчүгө карата 187,6 млн сом суммасындагы туум, санкция жана айып пулдары эсептен чыгарылды. Алардын ичинен туумдар 159,6 млн сомду, салык санкциялары – 28 млн сомду түзгөн. Мында субъекттер бюджетке 312,6 млн сом салык карызынын негизги суммасын төлөшкөн.
Ошондой эле камсыздандыруу төгүмдөрү боюнча карызынын негизги суммасын төлөгөн 1 миң 503 субъектиге 69,0 млн сом суммасындагы туум, санкция жана айып пулдары эсептен чыгарылды. Бюджетке 148,7 млн сом камсыздандыруу төгүмдөрү боюнча карыздын негизги суммасы төлөндү.
Салык төлөөчүлөр салык жана камсыздандыруу төгүмдөрү боюнча карыздарды кайра түзүмдөштүрүү үчүн катталган жери боюнча салык органына кайрыла алышат.
Эскерте кетсек, «Кошуп эсептелген пайыздар, туумдар, салыктык санкциялар боюнча карыздарды, камсыздандыруу төгүмдөрү боюнча айып пулдарды кайра түзүмдөштүрүү жөнүндө» Мыйзамына ылайык, төлөөчүлөр карыздын негизги суммасын төлөп, эсептелген туум, санкция жана айып пулдарды эсептен чыгаруу мүмкүнчүлүгүн пайдалана алышат.
