Айыл чарба министрлиги эл аралык сертификацияны иштеп чыгууну көздөөдө
Айыл чарба министрлиги Кыргызстанда эл аралык деңгээлдеги сертификацияны өнүктүрүүнү пландаштырууда. Бул үчүн жобо иштелип чыккан, ага ылайык ЕАЭБ өлкөлөрүнөн тышкары экспорттук сертификаттарды берген органдар бир катар артыкчылыктарга ээ болушат. Бул тууралуу органикалык айыл чарба департаментинин директору Бактыгүл Аскералиева маалымат жыйынында билдиргенин 24.kg маалымдады.
Анын айтымында, бүгүнкү күндө фермерлер сертификат алуу үчүн чет өлкөгө чыгууга аргасыз болуп, болжол менен 10 миң доллар төлөшөт. Жогорудагы пландар ишке ашса, дыйкандарга сертификат алуу үчүн башка өлкөгө баруунун кажети жок, жергиликтүү инспекторлор жумушту бүтүрүшөт.
«Эгерде филиалдар ачылса, кандай болгон күндө дагы алар жергиликтүү адистерди жалдашат, ошондо биздин адистер сертификаттоо процессин үйрөнүп, өздөрү күбөлүк берүүчү компанияларды ача алышат. Ошондо биз Европа Бирлиги менен органикалык стандарттар боюнча макулдашабыз, эгерде алар кабыл алынса, анда Кыргызстандын продуктылары толугу менен органикалык болуп эсептелет», – деди ал.
