Эл аралык эки банк Кыргызстандагы стартаптарды өнүктүрүүгө каражат бөлөт
Депутат Болот Сагынаев 2026-жылдын 2-мартында Жогорку Кеңештин илим, билим берүү, инновациялык өнүктүрүү жана маалыматтык технологиялар, маданият, спорт жана жаштар иштери боюнча комитетинин жыйынында жаш стартапчыларга каржылык жардам көрсөтүүнү сунуштады.
Финансы министринин орун басары Нурбек Акжолов белгилегендей, колдоо боюнча конкреттүү пландар бар: Дүйнөлүк банк жана Азия инвестициялык банкы Кыргызстандагы чакан жана орто бизнести, анын ичинде стартаптарды өнүктүрүүгө 170 млн доллар бөлүүнү пландашууда.
Ушул учурда Жогорку Кеңеште "Кыргыз Республикасынын айрым мыйзам актыларына венчурдук каржылоо маселелери боюнча өзгөртүүлөрдү киргизүү жөнүндө" мыйзам долбоору (биринчи окуу) каралууда.
Венчурдук фонд — АКШнын Баалуу кагаздар жана биржалар комиссиясынын глоссарийине ылайык, венчурдук фирма башкарган жеке фонддун түрү. Бул фонддор адатта бизнеске капиталдык үлүш алуу максатында инвестиция салат жана көп учурда белгилүү тармактарга же компаниянын өнүгүү баскычтарына (баштапкы, жетилген, кеч) адистешет. Венчурдук инвестициялар узак мөөнөттүү (адатта 10 жылдык) жана ликвиддүүлүк окуясына чейин “бекитилген” болот.
