Улуттук банк: эгерде «Мегакомду» сатып алуу сунушу түшсө карап көрүүгө даярбыз
Кечээ, 29-июлда өткөн Жогорку Кеңештин жыйынында «Мегаком» компаниясын сатып алуу Улуттук банкка да сунушталаары айтылды. Улуттук банктын төрагасы Толкунбек Абдыгулов эгер андай сунуш түшсө УБ аны карап көрүүгө даяр экендигин айтты.
Мамлекеттик мүлктү башкаруу фондунун төрагасы Мирлан Бакиров «Альфа Телеком» компаниясын сатуу Экономика министрлигине сунушталган жана ал Министрлер кабинетинен өтүп, учурда парламентке каралууга келгенин билдирип, «Мегаком» компаниясын сатып алуу Улуттук банкка дагы сунушталарын кошумчалады.
«Негизи УБ сатып алуучулардын бири катары чыгышы мүмкүн. Бул кабинеттин кароосунда. Эгерде УБ сатып ала турган болсо, анда ал мамлекеттин үлүшү катары эле калат», – деди Бакиров.
Депутат Улугбек Ормонов мамлекеттик мүлк кайра эле мамлекетке сатылабы деген суроону ортого коюп, УБтын төрагасы Толкунбек Абдыгуловго кайрылды.
«Азырынча УБга мындай сунуш боло элек. Бирок эгерде тиешелүү чечимдер кабыл алынса, сунушту изилдеп көрүп, тиешелүү чечим жасоого даярбыз», – деди УБнын төрагасы.
Жогорку Кеңеш Министрлер кабинетинин «Мегаком» бренди менен белгилүү «Альфа Телеком» мамлекеттик компаниясын (100% акциясын), Кепилдик фондун (14.9%), «Керемет» банкты (0.74%) жана Евразиялык сактык банкын (76.56%) сатуу сунушун колдоду.
«Мегаком» компаниясынын баасын көз карандысыз компания аныктагандан кийин ал аукцион, конкурс же түз сатуу аркылуу сатылат.
