Чек ара жаңжалынан Баткенге келтирилген зыян 1.3 млрд сомдон ашты – компенсация анын жарымын да жаппайт
Баткендеги кыргыз-тажик чек арасындагы жаңжалдан келтирилген зыян эсептелип чыкты. Анын суммасы – 1.3 млрд сомдон ашты. Бул тууралуу Регионалдык өнүктүрүү боюнча мамлекеттик агенттиктин директорунун орун басары Эрмек Бахавидинов кечээ, 12-августта маалымат жыйынында билдирди.
Анын айтымында, 140 үй, 76 коммерциялык жана 8 социалдык объект күйгөн. Азыр үйлөр калыбына келтирилип, ишкерлерге материалдык колдоо көрсөтүлүп, пайызсыз жана күрөөсүз кредиттер берилүүдө. Стратегиялык маанидеги жолдор калыбына келтирилүүдө.
Эске салсак, талкаланган социалдык объектилерди калыбына келтирүү үчүн республикалык бюджеттен 250 млн сом, каза болгондордун үй-бүлөлөрүнө компенсация төлөөгө 51.6 млн сом бөлүнгөн. Мындан тышкары, жабыркаган ишкананын ээлерине 14.5 млн сом бир жолку компенсация түрүндө, дагы 15.2 млн сом бюджеттик ссуда түрүндө берилет.
Бирок бул төлөмдөрдүн баары, жогоруда айтылган зыяндын суммасынын жарымын да жаппайт.
