2020-жылы КТРК жарнамадан дээрлик 4 млн сом киреше тапкан
2020-жылы КТРК эфир убактысы учурунда жарнамаларды жана жүгүрмө саптарды берүү менен 2 млн 900 миң сом, ал эми контентти жайгаштыруудан 723 миң сом киреше тапкан. Мындай маалыматты бүгүн, 8-сентябрда ЖКнын жыйынында телеканалдын директору Бактияр Алиев билдирди.
Анын айтымында, кызматкерлер алты телеканалда, үч радиостанцияда жана корпорациянын сайтында иштешет. Телеканал жыл сайын мамлекеттик казынадан 371 млн сом каржылоо алат.
«371 млн сом бул аз деп эсептейм, анткени корпорацияга 6 телеканал кирет. Бюджетти биринчи кезекте байкоочу кеңеш андан кийин ЭФМ менен парламент аныктайт. 2020-жылдагы парламенттик шайлоодон кийин КТРК 41 млн сом киреше көрдү: жарнамадан – 38 млн сом, контентти жайгаштыруудан – 723 миң сом, гранттар менен спонсорлордон болсо – 3 млн 549 миң сом пайда тапкан», – деп билдирди Бактияр Алиев.
