Эльдар Абакиров: Фроловду Кыргызстандын Улуттук банкына жолотпош керек

Фроловду Кыргызстандын Улуттук банкына жолотпош керек. Мындай пикирин экономика министринин мурдагы орун басары Эльдар Абакиров «Марал» радиосунун эфиринде билдирди.

Ошондой эле ал Улуттук банк тууралуу мыйзамга киргизилип жаткан финансылык технологиялар боюнча өзгөртүүлөрдөн күмөн санап турганын айтты.

«Финансы тармагында ишеним өтө чоң нерсе, Кыргызстанга ким акча берет-бербейт, Кыргызстанга инвесторлор акча салабы-салбайбы, айрым инвесторлор акчасын алып качып кетеби, бул түзмө-түз ишенимге байланыштуу», – деди ал.

Андан тышкары, ал радиого күмөндүү репутацияга ээ чет элдик банкир Владимир Фролов тууралуу да пикирин билдирди.

«Айрым депутаттар айтып жаткан Фроловду мен тааныбайт экем, бирок ал тууралуу интернетте бир да жакшы жаңылык жок. 2008-жылы Орусияда бир банкты банкрот кылып, башка бир банкка сатып жибериптир. 2014-жылы Орусиянын Борбордук банкы анын лицензиясын жокко чыгарыптыр. Ал мыйзамды бузуп, көп жаман иштерди кылыптыр. Жеке компанияларга ушундай таасир эткен кишини Кыргызстандын Улуттук банкына, Кыргызстандын мыйзамдарына жолотпош керек. Ага ишеним жок.  Ал тууралуу жаңылыктарды баары − инвесторлор, дүйнөлүк донорлор, спонсорлор окуп жатышат. Бул  Кыргызстандын рейтингине жакшы эмес», – деди экономист.

Абакиров ошондой эле «Кумтөрдүн» алтынын Улуттук банк эмне үчүн сатып ала албастыгы тууралуу да кеп козгогон.

«Кумтөрдүн» алтынын Улуттук банк сатып ала албайт, Сот иштери бүтө элек жатып, Улуттук банк «Кумтөрдүн» алтынын сатып алса, бул жалпы Кыргызстандын экономикасына, Улуттук банктын резервдерине, сомго таасир этет. Ошон үчүн Улуттук банк алтынды түзмө-түз сатып албаганы, менимче, туура эле. Сатып алгандан баштап, бизге ар кандай санкциялар киргизилиши мүмкүн, ага жол бербеш керек. Ал алтынды башка жолдор менен сатып алып, сатыш керек. Улуттук банктын алтынды сатып алуусу бүгүнкү күндө кооптуу», – деди ал.