Жаңы Министрлер кабинети банк секторунда эмнелерди өзгөртүшү мүмкүн? – «РСК» же «Керемет» Өнүктүрүү банкына айланышы мүмкүн
Жаңы Министрлер кабинети мамлекеттик банктардын бирин Өнүктүрүү банкына айлантышы мүмкүн. Бул тууралуу кечээ, 13-октябрда ЖКнын жалпы жыйынында белгилүү болду.
Президенттин Администрациясынын жетекчиси Акылбек Жапаров депутат Экмат Байпакбаевдин банк секторунда реформалар качан болоору тууралуу суроосуна жооп берип жатып, мамлекеттик банктардын бирин Өнүктүрүү банкына айлантса болоорун жана алардын уставдык капиталдарын көтөрүү маселеси тууралуу айтты.
«Айыл Банктын» уставдык капиталын жакында 100 млн долларга жеткиребиз, «РСК» менен «Керемет Банктын» уставдык капиталы буга чейин 100 млн долларга жеткен, «Кепилдик фонду» дагы 100 млн долларга жетет. Эгерде биз төртөөнү бириктирсек, анда өнүктүрүү механизмдери жана инструменттери пайда болот. Келечекте уставдык капиталды дагы көбөйтүү пландары бар», – деди Жапаров.
Ошондой эле Жапаров «РСК» же «Керемет» Өнүктүрүү банкы болушу мүмкүн деген оюн да айтты.
«Бирок менин пикиримде, эгер «Керемет Банк» капиталдаштырылса, биз аны Улуттук банктан сатып алып, аны өнүктүрүү банкы кылууга даярбыз. Бул жылы биринчи жолу ал киреше менен чыгат. Мамлекеттик банктардын бири ипотекалык багытта иштеши керек. Албетте, «Айыл Банк» айыл чарбасы багытында иштейт, ал эми «РСК» же «Керемет» Өнүктүрүү банкы болуп калышы мүмкүн. Жаңы жылга чейин чечим кабыл алынат», – деп кошумчалады ал.
