2027-жылы «Бишкек+25» глобалдык саммитин өткөрүү демилгеленүүдө
2027-жылы «Бишкек+25» глобалдык саммитин чакыруу демилгеленүүдө. Бул тууралуу 12-октябрда Нур-Султан шаарында КРнын Тышкы иштер министри Руслан Казакбаев Азияда өз ара аракеттенүү жана ишеним чаралары боюнча кеңешменин (АӨИЧК) Тышкы иштер министрлеринин 6-жолугушуусунда билдирди.
Ал БУУнун Башкы Ассамблеясынын учурдагы сессиясында «Тоолуу өлкөлөрдүн достору тобунун» атынан кыргыз тарап 2022-жылды Эл аралык тоо жылы деп жарыялоо демилгесин көтөрүп, тоолуу аймактарды туруктуу өнүктүрүү боюнча беш жылдык программаны бекитүүнү жана 2027-жылы «Бишкек+25» глобалдык саммитин чакыруу демилгелегендигин маалымдады. Ал АӨИЧКга бардык мүчө мамлекеттерди Кыргызстан демилгелеген жогорудагы иш-чараларга катышууга чакырды.
Ошондой эле ал АӨИЧКнын 30 жылдыгын, Казакстандын АӨИЧКны чыңдоодогу жетектөөчү ролун эске алуу менен, ал Кыргызстан менен Казакстандын АӨИЧКга төрагалыгынын артыкчылыктарын, анын ичинде Кеңешменин институционалдык өнүгүүсүнө багытталган аракеттерин, Аналитикалык борборлор форумун туруктуу иштеген платформага кайра түзүү аракеттерин колдой тургандыгын белгиледи. Төрагалыктын бул демилгелери АӨИЧКнын эффективдүүлүгүн жогорулатууга жана анын эл аралык аброюн бекемдөөгө мүмкүндүк берет деген ишенимин билдирди.
