«Шоро» компаниясы өндүрүшүн кеңейтүү үчүн ОКӨФ кредит берет
«Шоро» ЖАК Орус-кыргыз өнүктүрүү фонду (ОКӨФ) менен кредиттик келишимге кол койду. Компания алган каражатты өндүрүштү кеңейтүүгө жумшайт. Бул тууралуу ОКӨФтүн басма сөз кызматы билдирди.
Белгиленгендей, компания сүттү кайра иштетүү жана Россияда жасалган сүт азыктарын өндүрүү боюнча заманбап, жогорку өндүрүмдүү жабдууларды сатып алууну көздөөдө.
«Шоро» улуттук суусундуктарды, бөтөлкөдөгү сууну жана башка улуттук продукцияларды өндүрүү боюнча лидер болуп саналат. Компания тамак-аш коопсуздугунун эл аралык стандарттарга ылайык, улуттук суусундуктарды жана башка сүт азыктарын өндүрүүнү көбөйтүүнү пландап жатат. Сүттү кайра иштетүүнүн суткалык көлөмү 20 тоннаны түзөт, бул кеминде 200 дыйкан чарбасынын туруктуу иштешин камсыздайт.
«Бул инвестициялык долбоор даяр продукциянын көлөмүн кыйла көбөйтөт жана Чүй облусунда жаңы кластердик долбоорду түзөт. Бул КРнын экономикасынын кластердик өнүгүшүнө олуттуу түрткү берет», – деп баса белгиледи фонддун төрагасы Артем Новиков.
Компания даяр продукциясын экспорттоо менен алектенет жана жаңы өндүрүш ишканасынын ишке кириши экспорттук мүмкүнчүлүктөрдү кеңейтет, ошондой эле жаңы рынокторго чыгууга жол ачат. Долбоорду ишке ашыруу мамлекеттик бюджетке салык төлөмдөрүн көбөйтүү аркылуу Кыргызстандын экономикасына мультипликативдик таасирин тийгизет. Ошол эле учурда жергиликтүү фермерлерден чийки зат сатып алуу кошумча жумуш орундарын түзүп гана тим болбостон, өндүрүлгөн сүттүн көлөмү менен сапатын жогорулатууга стимулдаштырат деп эсептейт уюм.
