Кийинки жылы кимдердин маянасы көтөрүлөт?

Учурда казынанын киреше бөлүгүнүн өсүшү менен мамлекеттик бир катар кызматкерлердин эмгек акысы көтөрүлгөн. Бул тууралуу президент Садыр Жапаров 23-октябрдагы бир жылдык отчёттук маалымат жыйынында билдирип, кошумча дагы кайсы ведомстволордун кызматкерлеринин маянасын көтөрүүнү пландап жатканын айтты.

«Пандемия учурундагы оор кырдаалга карабастан, бардык социалдык төлөмдөр кечиктирилбестен, өз убагында төлөнүүдө. Салык жана бажы тармагында санариптик платформанын ишке кириши менен бюджеттин кирешеси көбөйдү», – деди Жапаров.

Үстүбүздөгү жылдын тогуз айынын жыйынтыгы боюнча, республикалык бюджеттин киреше бөлүгү 129 млрд сомду түзүп, план 107%га аткарылган. Анын киреше бөлүгү 2020-жылдын ушул мезгилине салыштырмалуу 43%га өскөн.

Жапаров белгилегендей, пандемияга чейинки 2019-жылга салыштырмалуу киреше 32%га өскөн. Ошол эле учурда бюджеттин чыгымдары да көбөйүүдө.

Ушул эле жылдын тогуз айынын жыйынтыгы боюнча, республикалык бюджеттин чыгаша бөлүгү 127 млрд 700 млн сомго жеткен, бул өткөн жылдын ушул мезгилине салыштырмалуу анын 20%га өскөндүгүн билдирет. Ал эми 2019 -жылга салыштырмалуу бул 26%ды түзгөн.

«Азыркы этапта бюджеттин киреше бөлүгүнүн өсүшү менен мамлекеттик кызматкерлердин эмгек акыларын, пенсия жана жөлөкпулдарды жогорулатууга мүмкүн болду. Мисалы, бул саламаттыкты сактоо, маданият, искусство жана медиа тармагында иштеген адистерге тиешелүү. Ошондой эле Коргоо министрлигинин, ИИМдин Ички аскерлеринин жана Чек ара кызматынын кызматкерлеринин айлык маянасы 40%га жогорулатылды», – деди Жапаров.

Анын айтымында, келерки жылдын 1-январынан тарта Өзгөчө кырдаалдар министрлигинин, Жазаларды аткаруу мамлекеттик кызматынын күзөт жана коштоо департаментинин кызматкерлеринин, ошондой эле Мамлекеттик Соттук экспертиза кызматынын адистеринин эмгек акысын орточо эсеп менен жогорулатуу пландаштырылууда.

«Биздин аракеттер бул менен эле чектелбейт. Мамлекеттик бюджеттин мүмкүнчүлүктөрүнүн негизинде биз бюджеттин башка кызматкерлеринин, анын ичинде мугалимдердин эмгек акысын жогорулатууну улантабыз. Кошумчалай кетсек, үстүбүздөгү жылдын 1-октябрынан тартып, ден соолугунун мүмкүнчүлүгү чектелген балдарга ай сайын берилүүчү социалдык жөлөкпулдун өлчөмү 50%га, 2022-жылдын 1-январынан баштап төлөмдөр 100%га, айрым категориялар үчүн 200%га көбөйтүлөт», – деди президент.

Ошондой эле пенсиянын базалык жана камсыздандыруу бөлүгүн индексациялоо да жүргүзүлгөн.

Күндүн негизги жаңылыктары — Telegram каналыбызда Каналга катталуу

Мындан тышкары окуңуз

Акыркы жаңылыктар

Баары

АӨБ менен кызматташуунун 2028–2032-жылдарга планы талкууланды

Өлкөгө 500 млн доллардан ашык инвестиция тартуу мүмкүнчүлүгү каралды

УчкайКЕП: Өлкөдө бир аптада орун алган маанилүү окуялар

5 жылда өлкө бюджети 4,5 эсеге өстү

Бишкекте лицензиясыз валюта алмаштырган эки жаранга айып пул салынды