Кара-Кечеден бир айда 200 миң тонна көмүр жүктөлдү – «Кыргызкөмүр»
Кара-Кечеде жумуш штаттык режимде жүрүп жатат, 15 күндүн ичинде 5613 машинеге көмүр жүктөлгөн. Бул тууралуу «Кыргызкөмүр» ишканасынын өкүлү Жийде Зоотбекова «Биринчи Радиого» билдирди.
«Бир айдын ичинде 200 миң тоннадан ашык көмүр жүктөлдү жана дагы ошондой эле тонна көмүр ачык турат. Кыргызстандыктар кооптонбой эле койсо болот», – деди ал.
Эскерте кетсек, күз-кыш мезгилинде КР 3 млн тонна көмүр жагат, бирок учурда «Кыргызкөмүр» ишканасы 200 миң тонна гана берүүгө даяр деп «Кыргызкөмүр» мамлекеттик ишканасынын директору Мирлан Жакыпов октябрдын башында ушул эле радиого берген маегинде билдирген болчу.
Анын ошондогу берген маалыматына ылайык, КР бир сезондо 3 млн тонна көмүр жагат, анын 1 млн 200 миң калк жагат. 240 миң тоннасы социалдык объекттерге кетет. 1 млн 600 миң тоннасын жылуулук борбору керектейт, бирок анын 600 миңи Казакстандан импорттолот.
Мирлан Жакыповдун айтымында, «Кара-Кече» акыркы 4-5 жылдан бери 455 миң тоннадан казып келе жаткан. Бирок быйыл өткөн жылга салыштырмалуу август айында 50%га артта калышкан.
Эскерте кетсек, 2021-жылдын 7-октябрында өткөн жылдын октябрына салыштырмалуу көмүрдүн орточо керектөө баасы республика боюнча орточо эсеп менен алганда бир тоннасы 715 сомго же 16%га өскөн. Ал эми 21-октярдагы Улутстаткомдун берген маалыматына ылайык, көмүрдүн орточо баасы өткөн жылдын октябрына салыштырмалуу 832 сомго (дээрлик 19%) жогорулады.
Ал эми Монополияга каршы мамлекеттик агенттик облустар, райондор, Бишкек жана Ош шаарларындагы көмүрдүн баасынын максималдуу чегин белгилеген. Ага ылайык, көмүрдүн түрүнө жана өндүрүлгөн жерине жараша анын килограммынын акыркы баасы – 2.5 сомдон 9.5 сомго чейин, тоннасы 2400дөн 8700 сомго чейинки бааны түзөт. Баалар социалдык мааниси бар товарлардын баасын мамлекеттик жөнгө салуу тартибине ылайык белгиленген. Кара отундун баасын көзөмөлгө алуу 12-октябрдан тартып 90 күнгө киргизилген.
