«Кыргызстандын маалымат соода порталы» бизнестеги кыйынчылыктарды жеңилдетет – Евробиримдиктин КРгы өкүлү
Кыргызстандык ишкерлер үчүн ачылган «Маалымат соода порталы» сооданын ачыктыгын жогорулатууга жана бизнестеги тоскоолдуктарды азайтууга жардам берет. Бул тууралуу бүгүн, 11-ноябрда Бишкекте өткөн порталдын ачылыш аземинде Евробиримдиктин Кыргызстандагы өкүлчүлүгүнүн жетекчиси Эдуард Ауэр билдирди.
Евробиримдиктин элчиси белгилегендей, акыркы эки жылда дүйнө пандемиядан улам бир топ өзгөрдү жана азыр бул жоготууларды бардык чаралар менен калыбына келтирүү, ошондой эле экономиканы инклюзивдик өнүктүрүүгө көмөктөшүү зарыл.
Элчинин пикиринде, чек ара соодасы экономиканы калыбына келтирүүнүн маанилүү элементи болуп саналат. Ал кыргыз бизнесин өнүктүрүүдө жана анын дүйнөлүк жеткирүү түйүндөрүнө катышуусунда негизги ролду ойнойт.
Ауэр «Маалымат соода порталын» ишке киргизүү Борбордук Азия өлкөлөрүнүн ичинде аймактык жана эл аралык сооданы кеңейтүүгө, ошондой эле ачык-айкындуулукка көмөктөшүүгө жана соодадагы тоскоолдуктарды азайтууга жардам берээрин, ошондой эле долбоор электрондук чек ара соодасын өнүктүрүү үчүн да маанилүү экендигин белгилеп өттү.
«Маалымат соода порталы»
Бүгүн, 11-ноябрда Бишкекте өлкөнүн экспортчулары менен импортерлору үчүн сооданы жеңилдете турган «Маалымат соода порталы» салтанаттуу түрдө ачылып, ишке кирди.
Портал ишкерлер үчүн импорттун жана экспорттун жол-жоболорун этап-этабы менен сүрөттөп берген өзгөчө онлайн платформа болуп саналат. Ал бизнес-коомчулукту колдоо жана соода чыгымдарын жана чек арадагы создуктурууну азайтуу үчүн түрдүү инструменттерди колдонуу аркылуу Кыргызстандын атаандаштыкка жөндөмдүүлүгүн жогорулатуу максатында түзүлгөн.
Учурда «Маалымат соода порталы» Кыргызстандын экономикасынын стратегиялык жана жумушчу орундарын түзүүчү секторлорунан 38 товарды жана чакан жана орто бизнестин өкүлдөрү тартылган бардык тармактардын 50%дан ашыгын камтыйт.
«Ready4Trade Борбордук Азия» долбоору
«Ready4Trade Борбордук Азия» долбоору – Европа Биримдиги менен Эл аралык соода борборунун биргелешкен демилгесинин натыйжасында ишке ашып келет. Долбоор региондогу ички жана эл аралык сооданы кеңейтүү аркылуу Борбордук Азиянын жалпы туруктуулугуна жана инклюзивдүү экономикалык өнүгүүсүнө салым кошууга багытталган. «Ready4Trade Борбордук Азия» долбоорунун бенефициарларына өкмөттөр, чакан жана орто ишканалар, атап айтканда, аялдар жетектеген ишканалар жана бизнести колдоо уюмдары кирет. Долбоор 5 өлкөдө: Казакстан, Кыргызстан, Тажикстан, Түркмөнстан жана Өзбекстанда ишке ашырылууда.
Соода порталы Кыргызстандагы Ready4Trade долбоорунун алкагында Экономика министрлигине караштуу «Тышкы сооданын бирдиктүү терезе борбору» мамлекеттик ишканасы тарабынан түзүлгөн. Кыргызстан Евробиримдиктин жалпы суммасы 15 млн еврого каржылоосу менен Эл аралык соода борбору тарабынан ишке ашырылып жаткан Ready4Trade Борбордук Азия долбоорунун беш бенефициар-өлкөлөрүнүн бири болуп саналат.
