Жыл аягына чейин бензин 8 сомго, дизель отуну 12 сомго чейин кымбаттайт – Нефтетрейдерлер ассоциациясы
Божомолдор боюнча жыл аягына чейин бензин 7-8 сомго, дизель майы 10-12 сомго чейин кымбаттайт. Бул тууралуу Нефтетрейдерлер Ассоциациясынын президенти Канат Эшатов Economist.kg басылмасына билдирди.
«Учурдагы көйгөйлүү маселе башка өлкөлөрдөгүдөй эле баалардын кымбатташы болуп жатат. Жаңы жылга чейин бензин 7-8 сомго, дизель отуну 10-12 сомго чейин көтөрүлүшү күтүлүүдө. Ал эми жетиштүү көлөмдө алып келүү боюнча өкмөттөр аралык келишимдер бар. Биз өкмөткө КНС менен акциз салыктарын алып салууну сунуштаганбыз. Эгерде алар биздин сунушту кабыл алса, бааларды бираз төмөндөткөнгө мүмкүнчүлүк болот», – деди Эшатов.
Эскерте кетсек, 2021-жылдын башынан бери бензиндин чекене баасы 70%га, дизель майы болсо 50%га чейин көтөрүлдү.
Монополияга каршы жөнгө салуу мамлекеттик агенттигинин маалыматы боюнча, бул күйүүчү майдын кымбатташынын негизги себеби Россиянын мунай иштетүүчү заводдорунда сатуу баасынын өсүп жатканы менен байланыштуу. Нефтетрейдерлер ассоциациясынын маалыматы боюнча, россиялык мунайды кайра иштетүүчү заводдордун сатуу баасы жыл башынан бери бензин тобуна 130%га, дизелдик отунга 70%га өскөн.
Мамагенттик учурда күйүүчү-майлоочу майлардын баасы рыноктук механизмдин негизинде түзүлүп жатканын жана анын баасына мамлекеттик орган тарабынан түз жөнгө салуу каралбаганын белгилейт.
Канат Эшатовдун айтымында, сентябрдын башында кыргызстандык компаниялар Орусиядагы заводдордон бензиндин тоннасын 700 доллардан алып турушса, азыр 800-820 доллардан сатып алууда. Дизелдик отундун чыккан баасы мурдагы айда 600 доллардан болсо, октябрда 700-720 долларга чыкты. Бул Кыргызстанда келерки айдагы бааларга таасир этет.
Учурда бензин рыногунда жалпы үстөмдүк кылган субъекттердин реестринде «Газпром Нефть Азия» ЖЧКсы, «Альфа-Ойл» ЖЧКсы жана «РН-Кыргызнефтепродукт» ЖАКсы бар.
Акыркы айларда КРда орточо эсеп менен КММ рыногунда баалар төмөнкүдөй өзгөргөн:
| Аталышы | 6-октябрь | 10-ноябрь | ноябрь менен октябрда |
| Бензин А-80 | 55.7 сом | 57.7 сом | +2 (же 3.6%) |
| Бензин А-92 | 57.3 сом | 58.7 сом | +1.4 (же 2.4%) |
| Дизель отуну | 51.6 сом | 54.2 сом | +2.6 (же 5%) |
