Кыргызстандын экономикасы он айда 1.6%га көтөрүлдү – ИДП өсүп баштады
Кыргызстандын ИДПсы январь-октябрь айларында 1.6%га өсүп, алдын ала эсептөөлөр боюнча дээрлик 557 млрд сомду түздү. Мындай маалыматты Улуттук статистикалык комитет билдирди.
«Кумтөрдү» эсепке албаганда өлкөнүн экономикасынын көлөмү январь-октябрь айларында дээрлик 507 млрд сомду түзүп, 4.1%га өстү.
Белгилей кетсек, үстүбүздөгү жылда октябрь ИДПнын өсүү темпинин оң көрсөткүчтөрүн берген экинчи ай болуп калды. Сентябрда ИДПнын бир аз өскөнү (0.1%га) байкалган.
Бирок былтыркы базанын төмөндүгүн эске ала турган болсок, улуттук экономиканын калыбына келүүсү жөнүндө сөз кылууга али эрте. Эске салсак, 2020-жылдын январь-октябрь айларында Кыргызстандын ИДПсы 7.4% төмөндөп, болгону 457 млрд сомду түзгөн. Ал эми Кумтөрдү эсепке албаганда төмөндөө 8.3%га чейин жеткен болчу.
