Жумушсуздук күч алды, эч кандай кирешебиз жок – Баткендин Максат айылынын эли президентке кайрылуу жасады
Жумушсуздук күч алды, эч кандай кирешебиз жок. Биздин элдин жашоо-турмушун көзөмөлгө алыңыз. Жашообуз кыйындап баратат. Жоголгон мал-мүлкүбүздү калыбына келтирип берүүңүздү суранабыз. Мындай билдирүүнү Баткен облусунун чек арадагы Максат айылынын тургундары президент Садыр Жапаровго жасаган кайрылуусунда айтышты.
Алардын айтымында, 28-30-апрелдеги Баткендеги чек ара окуясынан кийин жергиликтүү элдин жашоо-турмушу начарлап барат. Анткени эртеңкиден корккон эл үй-бүлөсүн таштап чет өлкөгө кетип иштей албай жатышат.
«Максат айылынын тургундары ошол окуядан кийин кыйналып жатышат, сыртка чыгып иштегенге мүмкүнчүлүк болбой жатат, анткени эл эртең кандай окуя болуп кетет деп коркуп турат. Жумушсуздук күч алды, эч кандай кирешебиз жок. Биздин элдин жашоо-турмушун көзөмөлгө алыңыз. Жашообуз кыйындап баратат. Жоголгон мал-мүлкүбүздү калыбына келтирип берүүңүздү суранабыз», – дешет алар.
Тургундардын айканына караганда айыл боюнча эл кыйналып турат.
«Техника, малды карызга алгандар бар. Учурда ошол карыздарын төлөй алышпай кыйналып жатышат. Мен өзүмдү мисалга алсам, Максат айылынан бир трактор уурдалды, мен ал трактордун жарымын карызга алган болчум. Кирешем жок болсо, алты балам менен жашоом оорлошуп баратат», – деди ал.
