Бишкекте мейманканаларга, ресторандарга жана кафелерге электр жарыгын үнөмдөө боюнча бекер консультация берилүүдө
Бишкек шаарындагы бардык мейманканалардын, ресторандардын жана кафелердин ээлери электр энергияны үнөмдөө боюнча акысыз консультация алууга чакырылат.
Чакан жана орто бизнестин өкүлдөрү электр энергиясы жетишсиз болгон суук мезгилде ишкана туруктуу иштеши үчүн күн панелдерин жана коллекторлорду орнотуу, бөлмөлөрдү жылуулоо жана желдетүү, тазалоочу шаймандар боюнча сунуштарды жана башка маанилүү сунуш-маалыматтарды ала алышат.
Консультациялар күн сайын иш күндөрү саат 08:00дөн 17:00гө чейин Бишкек шаарынын Абдымомунов 145 дарегинде берилип турмакчы.
Энергияны үнөмдөөчү технологиялар өндүрүш жана керектөө менен байланышкан айлана-чөйрөгө терс таасирин азайтууга жардам берет. Мындан тышкары, энергияны үнөмдөөчү чаралар мейманканалардын, ресторандардын жана кафелердин рынокто туруктуу жана атаандаштыкка жөндөмдүү болушуна өбөлгө болот.
Консультацияларды «Юнисон Групптун» көп жылдык тажрыйбасы бар инженерлери өткөрүшөт. Ар бир ишкерге жекече мамиле жасалат.
- Бардык суроолор боюнча бул телефондорго кайрылсаңыз болот: 0312 90 12 16, 0557 901 217, 0703 901 217, 0776 739 321.
Белгилей кетсек, бекер консалтинг Европа Биримдигинин SWITCH Asia программасынын каржылык колдоосу менен ишке ашырылып жаткан «Кыргызстандын туризм тармагында энергетикалык жана ресурстук эффективдүүлүктү илгерилетүү (ПЭРЭТО)» долбоорунун алкагында жүргүзүлөт. Ал Кыргызстандын туризм секторундагы чакан жана орто ишканалардын арасында туруктуу өндүрүш жана керектөө практикасын, ошондой эле энергияны жана ресурстук эффективдүүлүктү жайылтууга багытталган.
