Кара-Кулжа районунда самын чыгарышууда – бирок ишкер аялдар финансылык колдоого муктаж
Ош облусунун Кара-Кулжа районунда самын чыгарган ишкана ачылды. Бирок ишкананы ачкан Рахат Жантөрөева учурда финансылык колдоого муктаж болуп турганын Economist.kg басылмасына билдирди.
«Кыргызстанда бүт нерсе кымбаттап кетти, кир самындын баасы 50 сомго чейин чыгып жатат. Ошондуктан жок дегенде айылдагыларга жардам болсун деп бул демилгени көтөрүп чыккан элем. Бирок биринчи партияны чыгаргандан кийин финансылык колдоого муктаж болуп калдык, өндүрүш көп каражатты талап кылат экен. Үйдөгү буюмдарымды сатып, бизнеске салайын десем, жети балам бар, аларды ойлойм», – дейт ал.
Анын айтымында, негизги каражат учурда чийки зат сатып алууга жана алган карызына керек.
«Самын чыгарган аппараттын баасы 100 миң сомго түштү. Анын жарым акчасын төлөп, жарымын төлөй албай жүрөм. Самын экологиялык жактан таза, анын негизги курамын жаныбардын майы менен өсүмдүк майы түзөт. Андан тышкары, ага өзүнүн рецебине жараша сода жана башка ингредиенттер кошулат. Учурда ушул эки нерсеге каражат керек болуп жатат», – дейт жеке ишкер.
Economist.kg ушул сыяктуу колдоого муктаж болгон бизнеске аз пайыз менен насыя берип, КРгы ишкерлерге колдоо көрсөтүп келген белгилүү Орус-кыргыз фондуна кайрылды. Фонддон уюм 14 каржы мекеме менен иш алып бараарын, региондогу ишкерлер жергиликтүү өкүлчүлүктөр аркылуу консультация алса болоорун, фонд бизнес план түзүүгө адистер жардам беришээрин белгиледи.
«Эгерде 200 миң долларга чейин колдоо керек болсо, биздин өнөктөш коммерциялык банктарга кайрылышса болот, эгерде керек болгон сумма 200 миң доллардан ашса, анда биз түз иштешебиз. Бардык суроолорго жоопту, консультацияны http://www.rkdf.org/kg сайтынан же 0312 303750 телефону аркылуу алса болот», – деп жооп беришти уюмдан.
