Carcheck кызматы бекер болот – бирок жаңы функцияларга акы төлөнөт

Учурдагы Carcheck транспорт каражаты жана айып пулдун бар экендиги жөнүндө негизги маалыматты берүү кызматы бекер болот.  Акы төлөнүүчү өзгөртүүлөр кошумча опциялар үчүн гана каралат. Бул тууралуу Санариптик өнүктүрүү министрлиги маалымдайт.  

Төлөм кызмат көрсөтүүгө болгон суроо-талаптын жогорулашын эске алуу менен кызматты өнүктүрүү, колдоо, бузулууларды өз убагында алдын алуу зарылчылыгына байланыштуу киргизилүүдө.

10 сомго автотранспорт боюнча төмөнкү маалыматтарды кошумча киргизүү сунушталат:

• камакка алынган/күрөөгө коюлган транспорт каражаты жөнүндө маалыматтар (камактардын/күрөөлөрдүн болушу жана саны), эгерде бар болсо
• белгилүү бир убакыт аралыгындагы транспорт каражатынын ээси/ээлери жөнүндө тарых (ээлердин саны)
• одометрде транспорт каражаты басып өткөн жолду (пробег) көрсөтүүчү маалымат
• транспорт каражатынын фотосүрөттөрү.

Пайдалуу варианттарды жана сапаттуу колдоону кеңейтүү кошумча инвестицияларсыз мүмкүн эмес. Акы төлөнүүчү бизнес модели өзүн-өзү камсыздоону, тейлөө деңгээлин жогорулатууну жана өнүктүрүүгө инвестициялоону болжолдойт. Бул модель эл аралык практиканы эске алуу менен иштелип чыккан деп билдирди ведомстводон.

Эскерте кетсек, буга чейин Carcheck кызматы акылуу болоору тууралуу айтылган болчу.