«Бала-Саруу» ГЭСинин курулушуна 1 млрд сомго жабдуулар алынат
Киров суу сактагычындагы «Бала-Саруу» кичи ГЭСин куруу үчүн 1 млрд сомдон ашык каражатка жабдуулар алынат.
23-ноябрда «Чакан ГЭС» ААКнын акционерлери көмөкчү гидромеханикалык жабдуулары, автоматтык башкаруу жана сигнализация системалары менен гидроэнергетикалык жабдууларды сатып алуу боюнча ири келишимди бекитишти. Бул тууралуу Кыргыз фондулук биржасы (КФБ) билдирди.
КФБдан билдиргендей, кийинчерээк тиешелүү маалымат мамлекеттик сатып алуулар боюнча расмий порталда жарыяланат.
Эскерте кетсек, мурдараак акционердик коом «Бала-Саруу» ГЭСинин курулушунун долбоордук-сметалык документтерин иштеп чыгууга 106 млн сомго тендер жарыялаган.
Эске сала кетсек, Бала-Саруу ГЭСинин курулушуна капсула август айынын аягында салынган. Объекттин жалпы кубаттуулугу 25 мегаватт, орточо жылдык электр энергиясы 92 млн кВт саатты түзөт.
Керектүү каржылоонун көлөмү, иштелип чыккан техникалык-экономикалык негиздеме боюнча 22.9 млн долларды түзөт.Учурда Орус-кыргыз өнүктүрүү фонду (ОКӨФ) менен каржылоо боюнча маселе каралууда.
Долбоорду «Улуттук энергохолдинг» менен «Чакан ГЭС» ишке ашырат. Иштелип чыккан жол картасына ылайык, долбоор 2022-жылдын декабрында бүтүшү керек.
