«Айыл Банктын» коррупция боюнча иштерин иликтөө башталды – элге берилчү жеңилдетилген кредиттер депутаттарга берилген
«Айыл Банк» ААКдагы жөнөкөй жарандарга, фермерлерге берилчү жеңилдетилген кредиттер мамлекеттик кызматкерлерге, депутаттарга берилип келген. Бул коррупция фактысы боюнча иликтөө иштери башталды. Бул тууралуу УКМКнын маалымат кызматы кабарлады.
Эскерте кетсек, президенти Садыр Жапаровдун КРнын Коопсуздук кеңешинин жыйынында айтылган тапшырмасына ылайык, УКМК 100% акциясы мамлекетке тиешелүү болгон «Айыл Банк» ААК ишмердүүлүгүнүн ар кандай чөйрөлөрүндөгү коррупциялык көрүнүштөрдү текшерди.
«Текшерүүнүн жыйынтыгында, «Айыл Банк» ААК тарабынан айрым компанияларга өтүмсүз мүлктү күрөөгө коюу боюнча ири өлчөмдөгү кредиттерди мыйзамсыз жана туура эмес бөлүп берүү фактылары боюнча маалыматтар тастыкталды.
Мындан тышкары, аталган насыялар калктын социалдык жактан аялуу катмарына, ошондой эле дыйканчылыкты жана мал чарбачылыгын өнүктүрүүгө багытталганы, чындыгында бул кредиттердин Банкка төлөмдөр боюнча чоң карызы бар экендиги аныкталды», – деп айтылат ведомствонун билдирүүсүндө.
Буга байланыштуу УКМК тарабынан КРнын Кылмыш-жаза кодексинин 319-беренесинин 1-бөлүгү (Коррупция) боюнча сотко чейинки өндүрүш иши башталып, анын алкагында тергөө тарабынан, жасалган кылмыштын бардык жагдайларын аныктоого багытталган тергөө аракеттери жүргүзүлүүдө.
Көрсөтүлгөн сотко чейинки өндүрүштү иликтөөнүн жыйынтыгы боюнча «Айыл Банк» ААКтын жооптуу адамдарынын жана башка жактардын аракеттерине юридикалык баа берилип, бул тууралуу коомчулукка кошумча маалымат берилээрин УКМК билдирди.
