Садыр Жапаровдун мурдагы адвокаты Бишкек шаардык сотуна судья болуп дайындалды

Эскерте кетсек, 4-ноябрда президент Садыр Жапаров жергиликтүү сотторго бир катар судьяларды дайындаган. Жергиликтүү соттордун судьялары Сот адилеттиги иштери боюнча кеңештин сунуштамасы менен президент тарабынан биринчи жолу 5 жылдык мөөнөткө, андан кийинкисинде курагынын чегине жеткенге чейин дайындалат.

Жаңыдан судья болгондордун арасында өлкө башчынын мурдагы адвокаты Шарабидин Токтосунов Бишкек шаардык сотунун судьясы болуп келди.

Белгилей кетсек, Токтосунов Садыр Жапаровду 2012-жылы «Бийликти күч колдонуп басып алууга аракет кылуу» иши боюнча, 2013-жылы Ысык-Көл облусунун Каракол шаарында массалык башаламандык уюштурууга жана Эмил Каптагаевди барымтага алууга айыптаганда сот иштеринде аны жактап келген.

Ал эми Токтосунов бул кызматка конкурс аркылуу келгенин Vesti.kg басылмасына: «Мен судьялыкка талапкерлигимди көрсөтүү үчүн арыз жазган конкурс жарым жылга созулду. Өткөнүмө аябай сүйүндүм, эми иштеш керек», – деп айткан.

Ал эми судьялык кызматка президенттин аркасы менен келди деген сөздөргө Токтосунов жооп берүүдөн баш тарткан.