КР Улуу Британия, Түндүк Ирландия менен кирешелерге кош салыкты алып салуу боюнча макулдашууну кароодо
Бүгүн, 13-декабрдагы Жогорку Кеңештин Эл аралык иштер, коргоо жана коопсуздук боюнча комитетинин кезектеги жыйынында «2017-жылдын 13-июнунда Бишкек шаарында кол коюлган КРнын Өкмөтү менен Улуу Британия жана Түндүк Ирландия Бириккен Королдугунун Өкмөтүнүн ортосундагы Кирешелерге жана капиталдын өсүшүнө кош салык салууну болтурбоо жана салыктарды төлөөдөн качуунун алдын алуу жөнүндөгү» макулдашууну ратификациялоо маселеси биринчи окууда каралды.
Жыйында баяндама жасаган Экономика жана коммерция министринин орун басары Эльдар Алишеров белгилегендей, макулдашуунун максаты – өнөктөш өлкөлөр ортосундагы кош салык салууну болтурбоо жана ар бир мамлекетке кирешелердин жана капиталдын аныкталган түрлөрүнө салык салуу укугун бекитүү. Ошондой эле чарбакер субьекттердин кирешелерине жана капиталына карата ар кайсы өлкөдө бирдей салыктар менен кош салык салууну жокко чыгаруу болуп саналат.
Аталган мыйзам долбоору киреше жана капиталдын белгилүү түрлөрүнө салык салуу укугун ар бир мамлекетке бекитип берүү жолу аркылуу өнөктөш өлкөлөр жана чет өлкөлөр ортосундагы өз ара салыктык мамилелерди жөнгө салууну камтыйт.
