«Айыл Банкка» нааразы болгон дыйкандар митингге чыгышты
Жыйырмага чукул дыйкан-фермерлер өкмөт үйүнүн алдына нааразылык акциясына чыкты. Кыргызстандын аймактарынан чогулган дыйкандар лизингге айыл-чарба техникаларын ала албай даттанып жатышканын «Азаттык» билдирди.
Белгилей кетсек, өкмөт быйыл октябрь айында «Айыл Банк» аркылуу дыйкандарга 4.5% насыя берилет деп убада кылган.
Берилген маалыматка ылайык, дыйкандардын алды лизингге техника алуу үчүн баштапкы төлөмдү төлөшкөн. Бирок, кийин «Айыл Банк» акча жок экенин, насыяны 14% берүүгө даяр экенин билдирген. Дыйкандар 14% өтө эле жогору деп нааразы болуп жатышканын аталган маалымат булагы билдирет.
Эскерте кетсек, президент Садыр Жапаров 6-декабрда дыйкандар жер салыктарынан бошотулаары жана аларга 6%дык кредиттер берилээри тууралуу жарлыкка кол койгон болчу. Ал эми 26-ноябрда Коопсуздук кеңешинин жыйынында УКМКнын башчысы Камчыбек Ташиевге мамлекеттик банктардын дыйкандарга жеңилдетилген насыя бергенин текшерүү тапшырмасын берген эле.
