Индиялык «Дхарамшила Нараяна» клиникасы Бишкекте расмий өкүлчүлүгүн ачууну пландоодо
Индиялык «Дхарамшила Нараяна» клиникасы Бишкекте расмий өкүлчүлүгүн ачууну пландоодо. Бул тууралуу аталган клиниканын жетекчилиги КРнын Тышкы иштер министри Руслан Казакбаев менен жолугушуу учурунда билдиришкен.
Үстүбүздөгү жылдын 20-декабрында Нью-Дели шаарында «Индия – Борбордук Азия» диалогуна катышуунун алкагында Тышкы иштер министри Руслан Казакбаевдин Индиянын алдыңкы кеңири профилдүү «Фортис» жана «Дхарамшила Нараяна» клиникаларынын жетекчилери менен жолугушуулары болуп өттү.
Жолугушуулардын негизги максаты Индия клиникаларында кыргызстандык бейтаптарды дарылоо шарттарын оптималдаштыруу боюнча мындан аркы кадамдарды талкуулоо жана карап чыгуу болду.
«Дхарамшила Нараяна» клиникасынын өкүлдөрү жакын арада Бишкекте расмий өкүлчүлүгүн ачуу пландары тууралуу маалымдашкан жана ошондой эле КРнын жарандарын жеткиликтүү баада дарылоону уюштурууга даяр экендигин билдиришкенин ТИМдин маалымат кызматы билдирди.
Жолугушуунун жыйынтыгында министр Казакбаев Индиянын «Фортис» жана «Дхарамшила Нараян» клиникаларынын жетекчилерин КРга чакырып, зарыл жардамды көрсөтүүгө, анын ичинде КР Саламаттык сактоо министрлигинин жетекчилиги, ошондой эле КРнын кызыкдар мамлекеттик органдары жана бизнес коомчулугу менен жолугушууларды уюштурууга даяр экендигин белгиледи.
Тараптар медицина тармагындагы кызматташтыкты чыңдоо жана талкууланган сунуштарды андан ары ишке ашыруу боюнча күч-аракеттерди бириктирүүнү макулдашты.
