Бишкектеги Исакеев көчөсүндөгү унаа токтотуучу жай акы төлөнүүчү тартипке өттү
Бишкек шаарынын мэри Айбек Джунушалиевдин тапшырмасы менен Исакеев көчөсүндө жайгашкан унаа токтотуучу жайда тартипке келтирүү иштери жүргүзүлдү. Бул тууралуу муниципалитеттен билдиришти.
Маалыматка ылайык, күн мурун “Шаардык жол-транспорттук инфратүзүм” муниципалдык ишканасынын директору Бакай Асылбек уулу аталган аймакка барып, кырдаалды жеринде жөнгө салды. Текшерүүнүн жүрүшүндө уруксат берилбеген жерлерге токтотулган, ошондой эле дарыгерлер, бейтаптар жана студенттер үчүн каралган орундарга коюлган унааларга протоколдор түзүлдү. Көптөн бери токтоп турган айрым унаалар айып короого жеткирилди.
Буга чейин бул аймак коноктор үчүн унаа токтотмо катары пайдаланылып келген. Мындан ары унаа токтотуучу жай муниципалдык негизде уюштурулуп, акы төлөнүүчү тартипте иш алып барат.
Унаа токтотмо 100 автоунаага ылайыкталган. Иш тартиби күн сайын саат 08:00дөн 20:00гө чейин. Аймакта “ШЖТИ” МИнин кызматкерлери нөөмөт жүргүзүп, айдоочуларга түшүндүрүү иштерин жүргүзүшөт.
Ошондой эле мамлекеттик каттоо номери жок унаалардын токтотулушуна жол берилбейт. Талаптар бузулган учурда мыйзам чегинде тиешелүү чаралар көрүлөт.
