Президент энергетика тармагындагы пландарын айтты
Президент Садыр Жапаров бүгүн, 22-декабрь — КРнын Энергетиктер күнүнө байланыштуу энергетиктерди кесиптик майрамы менен куттуктап жатып, энергетика тармагындагы бир топ пландар тууралуу айтты.
Президент Кыргызстан өзүнүн эң маанилүү тармагын өнүктүрүүгө жана энергияны экспорттоочу мамлекет болушуна тоскоолдук жаратып жаткан бир канча көйгөй бар экенин, алардын негизгиси — электр кубатынын жетиштүү топтомдо болбогондугун, чакан жана ири гидроэлектростанцияларды куруу жана энергиянын башка, кайра жаралуучу булактарынан пайдалануу мүмкүнчүлүктөрүбүз болуп туруп, бөлөк өлкөлөрдүн энергетика тармагын өнүктүрүүгө салым кошууга аргасыз болуп келгенибиз тууралуу айтты.
Ошондой эле ал энергетика жаатында ушундай артыкчылыктарды туура пайдалануу аркылуу Кыргызстанды электр кубаты менен эч көйгөйсүз толук камсыз кылуу жана экспорттоо потенциалын өнүктүрүү максатында жакынкы жылдарда төмөнкү тапшырмаларды аткаруу зарыл экендигин белгиледи.
- иштеп жаткан ГЭСтердин кубаттуулугун 20%га көтөрүү менен бирге толук кандуу реконструкциялоо жана жаңылоо
- Борбордук жана Түштүк Азиядагы төрт мамлекетти бириктирип турган электр энергиясын берүүчү жогорку чыңалуудагы жаңы тутумду (CASA-1000) киргизүү
- энергиянын атаандаш булактарын пайдаланууга берүү, ошондой эле Нарын дарыясында кубаттуулугу 100 мегаватт болгон Куланак ГЭСин иштетүү, андан тышкары, мамлекеттик-менчик өнөктөштүгүнүн алкагында Талас облусундагы Киров суу сактагычында өндүрүмү 25 мегаватт болгон Бала-Саруу ГЭСин, ал эми Орто-Токой суу сактагычында кубаттуулугу 21 мегаватт түзгөн чакан ГЭСти жана Кемин районунун Чүй айланма каналында чакан ГЭСти ишке түшүрүү жана башкалар.
«Бүгүнкү кесиптик майрамыңыздар кут болсун! Жалпы энергетиктерге жана тармактын ардагерлерине чың ден соолук, бакубат жашоо тилейм. Жалпы эл карап турган жоопкерчиликтүү ишиңиздерде жаңы жетишкендиктер, албан-албан ийгиликтер коштосун!», – деди президент.
