«Эти Бакыр Терексай» ишканасы суу чачыраткыч жабдуу сатып алды
«Эти Бакыр Терексай» ишканасы жер казууда айлана-чөйрөгө чыгып жаткан чаңды азайтуу максатында Кытайдан атайын суу чачыраткыч жабдуусун сатып алды. Бул тууралуу аталган ишкананын маалымат кызматы билдирди.
Жабдуу атайын казуу иштери жүргүзүлүп жаткан карьерлерде колдонулмакчы. Ал сууну газ түрүндө чачыратып, чаңды жок кылат. Азыр механикалык бөлүм тарабынан атайын жүк ташуучу унаага суу цистернасы, трансформатор жана суу чачыраткыч жабдуу орнотулуп, унаанын жардамы аркылуу карьерлерге барат. Суу чачыраткыч унаа газ түрүндөгү сууну 100 метр алыстыкка чейин чача алат. Ишкана жабдуунун жардамы аркылуу абага чыгып жаткан чаң жок боло тургандыгын билдирди.
Эскерте кетсек, өткөн жылы 9-сентябрда Терек-Сай айылынын тургундары дал ушул чаңга байланыштуу «Эти Бакыр Терексай» алтын кенин иштеткен компаниянын ишмердүүлүгүнө нааразы болуп, митингге чыгышкан болчу. Жергиликтүү тургундардын айтымында, ишкананын ишмердүүлүгү абаны булгап, балдардын оорусуна себеп болууда. Эң чоң көйгөй чаң болууда деп билдиришкен эле алар.
- «Эти Бакыр Терексай» ЖЧКсы биргелешкен ишкана, 25% үлүшү кыргызстандык «Кыргызалтынга», 75% түркиялык «Эти Бакыр» ААКга таандык. Мында долбоорду каржылоо милдетин толугу менен түрк тарап мойнуна алган.
