Бийлик базарларда ККМди милдеттүү колдонууну жокко чыгарууну пландоодо
Бийлик жаңы Салык кодексинин 128-беренеси боюнча жаңы токтомду киргизүүнү жана базарларда контролдук-кассалык машиналарды (ККМ) милдеттүү түрдө колдонууну жокко чыгарууну пландоодо. Бул тууралуу Kaktus.media өздүк булактарына таянып жазып чыкты.
128-берене ККМ колдонууну жөнгө салат. Анда ККМ колдонбосо боло турган субъекттердин тизмеси Министрлер Кабинети тарабынан аныкталат деп айтылат.
«Жаңы токтомдо ККМ колдонулбай турган объектилердин тизмесин белгилөө пландалууда. Бирок азырынча бул канча убакытка созулары белгисиз», – деп билдиришкен өздүк булактар.
Эскерте кетсек, жаңы кабыл алынган Салык кодексине ылайык, ККМди соода жана коомдук тамактануу түйүндөрү, дарыканалар, авиакассалар, май куюучу жайлар, интернет-дүкөндөрү, ошондой эле калкка кызмат көрсөтүүчү жана калк менен накталай же накталай эмес эсептешүүлөрдү жүзөгө ашыруучу субъекттер милдеттүү түрдө колдонушу керек болчу.
Белгилей кетсек, буга чейин республиканын бир топ аймактарында жана Бишкекте базардагы жеке ишкерлер ККМди колдонууга каршы болуп, нааразычылык акцияларына чыгып жатышкан.
