Ирригация тармагын оңдоп-түзөөгө 1 млрд сом бөлүнөт
Бүгүн, 28-январда «Элдик» депутаттык тобу жазгы айдап-себүү иштерине карата жүргүзүлүп жаткан даярдык боюнча маалымат укту. Анда Айыл чарба министри Аскарбек Жаныбеков ирригация тармагын оңдоп-түзөөгө, тиешелүү иштерди жүргүзүүгө, айрыкча, суу куурларын жаңылоого 1 млрд сом каралып жатканын билдиргенин ЖКнын маалымат кызматы кабарлады.
Министрдин маалыматына караганда, 2021-жылы айыл чарба каналдарын оңдоп-түзөөгө, гидротехникалык курумдарга жана каналдарга 163 млн сом сарпталган.
Депутаттар жазгы айдап-себүү ишине күйүүчү-майлоочу каражаттарды, үрөндөрдү, минералдык жер семирткичтерди арзан баада камсыздоо, жеңилдетилген насыяларды берүү, айдоо аянттарын кеңейтүү, андан тышкары, сугат иштерине даярдык көрүү маселелерин көтөрүштү.
Эскерте кетсек, быйыл жазында дыйкандарга жазгы талаа иштерине 50 миң тоннага чейин күйүүчү май керектелет. Ал эми буга чейин Министрлер кабинети Айыл чарба министрлигине сугат иштерине жана үрөн сатып алууга 2 млрд сом бөлүнөөрүн убадалаган. Ошондой эле «Айыл Банк» айыл чарба секторун 200 млрд сомго дейре насыялоону көздөөдө.
