Кыргызстанда 1.4 млн автоунаа бар
1995-жылдан тартып республикада автоунаалардын саны он эсеге өстү. Учурда Кыргызстанда 1.4 млн автоунаа бар. Бул тууралуу Министрлер кабинетинин төрагасынын орун басары Азиз Аалиев Транспорт, коммуникациялар, архитектура жана курулуш боюнча комитетин Парламенттик угууда билдирди.
Анын берген маалыматына таянсак, анын ичинде жүргүнчүлөрдү ташый турган 4500 машине, жүк ташыган 213 миң машине бар.
«Ага жараша күйүүчү-майлоочу майдын (КММ) сарпталышы да көбөйүп жатат, бензин көлөмүн алып көрсөк, Россиядан келген КММнын квотасын 460 миң тоннадан 650 миң тоннага чейин көбөйттүк. Жылдык керектөө барган сайын өсүүдө», – деди Аалиев.
Ал эми Нефтетрейдерлер ассоциациясынын башчысы Канат Эшатовдун айтымында, Кыргызстандын күйүүчү майды жылдык ички керектөөсү 1.4 млн тоннага жетет.
Бул парламенттик угууда Аалиев жол фондун түзүүнүн оң жактарын белгилеп, жол тармактарын каржылоодо эл аралык тажрыйбаларды мисал келтирди.
«Өнүккөн Россия, АКШ, Япония сыяктуу өлкөлөрдү карап көрсөк, аларда жол фонду түзүлөт экен жана негизги булагы болуп – КММга болгон салыктар эсептелет экен. Дүйнө жүзү боюнча бензиндин ар бир сатылган литринин акыркы баасында 50-70%га чейинки салыктар кошулат экен. Биздин өлкөдө 1 литр КММ, мисалы, АИ-98 маркасындагы бензинге салыктын ставкасы 25%, АИ-80 маркасына 30%, дизелдик майга болсо 15%ды түзөт. Бул КНС, сатуудан түшкөн салык жана акциз», – деди Министрлер кабинетинин төрагасынын орун басары.
Эскерте кетсек, өткөн жылы ушул мезгилде күйүүчү май 32 сомдун тегерегинде болуп жатса, март айынан тартып, кескин көтөрүлө баштап, ал жыл ичинде 70%га өскөн.
