Садыр Жапаров: Жакында тоо балыбыз, сүт азыктары, мөмө-жемиштер Кытайдын рыногуна кирет
Президент Садыр Жапаров учурда Кыргызстан экологиялык жактан таза айыл чарба продукциясын Кытайга экспорттоо боюнча иштерди жүргүзүп жатканын билдирди. Бул тууралуу ал Кытайдын эл аралык CGTN телеканалына берген маегинде айтты.
«Жакында кытай рыногунда тоо балыбызды, сүт азыктарын жана мөмө-жемиштерди көрөсүңөр деп ишенем», – деди президент.
Ал ошондой эле акыркы бир нече жылда Кыргызстандын башка өлкөлөр менен соода жүгүртүүсүндө Кытай негизги орунду ишенимдүү ээлегенин баса белгиледи. Коронавирус пандемиясына карабастан, сооданын өсүшү 2021-жылы басаңдаган эмес.
«Кыргыз-кытай экономикалык кызматташтыгын мындан ары чыңдоо үчүн айыл чарба жана кайра иштетүү өнөр жайы, экология, энергетика, кичи жана орто бизнести колдоо сыяктуу маанилүү тармактарда комплекстүү иштерди жүргүзүү, эки өлкөнүн аймактарынын ортосундагы кызматташтыкты чыңдоо, банктык-финансылык платформаларды түзүү, инвестициялык долбоорлорду стимулдаштыруу, ошондой эле электрондук коммерциянын артыкчылыктарын натыйжалуу пайдалануу маанилүү деп эсептейм», – деди Жапаров.
