Талас облусунда кант заводу ишке кирди – аз камсыз болгондорго бекер берилет
Талас районунда «Альянс Алтын» компаниясынын колдоосу менен кант заводу ишке берилди. Анын расмий ачылыш аземине Министрлер кабинетинин төрагасы Акылбек Жапаров катышты.
Долбоор «Альянс Алтын» компаниясынын алдында түзүлгөн «Бакубат Талас» фондунун колдоосу менен ишке ашты. Кант заводун ишке киргизүүгө фонд тарабынан 16.8 млн сом бөлүнгөн. Белгилей кетсек, каражат пайызсыз негизде берилген.
«Завод 100 жумушчу орунга ылайыкталган. Бул жерде суткасына 50 тонна шекер кайра иштетилет. Заводдун өндүрүмдүүлүгүн 1000 тоннага чейин жеткирүү пландалууда», – деп билдирди ишкананын жетекчиси Бактыбек Чаткалбаев.
Келишимге ылайык, жыл ичинде комбинат Талас облусунун калкынын социалдык жактан аялуу катмарына 20 тоннадан кем эмес кумшекер берет.
«Бул «Альянс Алтын» ишканасы койгон негизги шарттарынын бири», – деп билдиришти компаниядан.
Белгилей кетсек, буга чейин дыйкандар кант кызылчасын Маймак станциясы аркылуу Чүй облусундагы кант заводдоруна жөнөтүшчү. Эми быйылдан баштап дыйкандар менен кант кызылчасын алуу боюнча келишим түзүлөт.
Статистикалык маалыматтарга таянсак, 2021-жылы облуста кант кызылчасынын айдоо аянты 371 гектарды түзүп, андан 12.8 миң тонна түшүм жыйналган.
Эске салсак, Талас облусу 2021-жылы негизинен «Альянс Алтын» ишканасынан түшкөн салыктын эсебинен дотациядан чыккан. Эксперттер бул облуста экономиканын өсүшүн болжолдошууда.
