Кемчилиги бар чарбаларды биз колдобойбуз – Айыл чарба министри
Кемчилиги бар чарбалар менен чогуу баспайбыз, биз аларды колдобойбуз. Мындай пикирин Айыл чарба министри Аскарбек Жаныбеков бүгүн, 14-февралда ЖКнын Агрардык саясат, суу ресурстары, экология жана регионалдык өнүктүрүү боюнча комитетинин жыйынында айтты.
Анын айтымында, аз гана кишинин кызыкчылыгын көздөгөн асыл тукум чарбалар статусунан ажырайт.
«Себеби, аларда бир топ кемчиликтер бар. Кемчилиги бар чарба менен биз чогуу баспайбыз, аларды биз колдоойбуз. Мен сиздерге министр катары расмий ишенич айта алам», – деди министр.
Депутаттар статусунан ажыраган чарбалар андан ары кандай иш алып бараары тууралуу да суроолорун беришкенде, министр ал жерлер мамлекеттики болсо толугу менен алынаарын билдирди.
«Алар статусунан ажыраган күнү эле, жерди ижарага алуу укугунан да ажырашат. Биринчиден, ал жерлер айыл өкмөтүнө кайра кароого жөнөтүлөт. Экинчиден, статусунан ажыраган чарба үрөн да ала албайт. Катардагы эле чарба болуп калат», – деди Жаныбеков.
Белгилей кетсек, жыйында Министрлер кабинетинин 2021-жылдын 17-декабрындагы «Айыл чарба кооперативдерин, үрөнчүлүк жана асыл тукум чарбаларын өнүктүрүү жөнүндө» №309-токтому боюнча айылдык товар өндүрүүчүлөрүнөн түшкөн кайрылуулар тууралуу маселелер каралууда.
